工人姐姐洗爛名牌手袋 僱主嬲爆問：係咪最多賠$300？

　　港男在fb群組「聘請工人姐姐關註組」發文，分享了兩張圖片，指「今日老婆激嬲，要姐姐抹下個GG袋(GUCCI手袋)，佢居然放咗落洗衣機洗，成個袋洗到爛咗，想問嚇係咪姐姐整爛嘢最多賠$300(個袋畀咗佢)」。從圖片可見，手袋有部分位置嚴重脫線，已無法復原。

　　帖文引起不少網民熱議，有人表示「我自己貴嘢唔會叫工人幫我洗」、「貴重物品應該要同佢講埋點樣洗，唔好當d姐姐咁叻，十個九個半都唔識轉彎」。有人就分享類似經歷，「我完全明白樓主感受。都試過啲波衫洗完，個工人姐姐竟然拎咗去熨，熨到件衫邊位啲膠溶咗，喊三聲～」、「我試過將自己條LV頸巾放喺床尾，佢無端端自己攞咗我條LV去洗，洗完出嚟成條報銷，一句sorry mum…最慘我無叫佢去洗」、「我條Gucci羊毛頸鏈咪一樣洗到而家硬過塑膠」。